تنوين | بلسانٍ عربي
تنوين | بلسانٍ عربي
:
:

المخدرات.. منتج وطني

40:00
دقائق
تنوين
المخدرات.. منتج وطني

المخدرات آفة اجتاحت العراق بعد سقوط النظام السابق، بسبب ضعف القانون وعدم السيطرة على المنافذ الحدودية، نتج عن ذلك انتشار ظاهرة تداول وتعاطي المخدرات بين شرائح كثيرة ومهمة في المجتمع وخصوصاً الشباب، تناقش هذه الحلقة بطرح ساخر الطريقة التي انتشرت فيها المخدرات في العراق وكيف استقبلها الشعب وماهو موقف الجهات الأمنية من هذه الآفة.

تقديم: مختار طالب


الحلقة الثانية

مخدرات

فقرة اخبار ساخرة

اهلا بكم مشاهدينا الأكارم، ولك مشاهدينا شنو هاي شبيك منين حتطلع الهم من باب الثلاجة من باب الكنتور هو بودكاست يعني بس صوت يا مشاهدينا... هاااا ... اي صح اهلا بيكم مستمعينا الاعزاء، مستمعي مايكروفون عراقي على  تنوين بودكاست، وفي حلقتنا لهذا اليوم شنو والله ولا واحد بيكم يطلع منا صاحي، الكل فاصله لازم. 

لا جذب يمعودين لتصدكون. اليوم حلقتنا عن المخدرات بالعراق. أني معليه راح احجي على المخدرات اذا انت من الحجي تنسطر وتفصل شسويلك بعد. 

طيب مستمعينا الكرام سنبدأ هذه الحلقة بعد ان نستمع الى موجز الانباء ونشوف شعدنا من بلاوي. 

موسيقى اخبار

اهلاً بكم مستمعينا الاكارم اليكم موجوزٌ لأهم الانباء لهذا الاسبوع الاكشر:

موسيقى فاصل موجز قصيرة

قوات الامن في الانبار تلقي القبض على مئة ألف حبة مخدرة تم العثور عليها اثناء حملة تفتيش لأحد المنازل.... عزيزي المواطن ادري هي شنو مية الف حبه ادري هاي مخدرات لو حساب على الانستكرام.

موسيقى فاصل موجز قصيرة

محافظ الديوانية يدك على راسه ويطلم ويصرح “40% من شباب المحافظة يتعاطون المخدرات” .... عزيزي المستمع انت سمعت لو لا! اربعين بالميه يعني حتى الشارع يتعاطى مخدرات.

موسيقى فاصل موجز قصيرة

اب يقتل عائلته في بغداد بعد تناوله للمخدرات... احسن شي سويته لا صرف ولا اكل ولا تعال ربيهم وخبصه ولا اشتراكات نت ولا جهال بنتك مكابليك كل يوم خفةَ وراحه حياة مال تسعينات

يعني الي يصفن للعراق يكول الله شكد حلو هذا البلد كل شي صار بيه شعجب شعبه ميتعاطون مخدرات، امان بيه امان تطور عمراني بيه تطور عمراني كل مواطن ماخذ حقة ، الجو مالته ... المطر من يوكع ميفوت للبيت يشرب ويانا جاي بالهول اكيد ميفوت...... لعد لييييش ميتعاطون مخدرات صدك جذب.... أي والله غريبة هالشعب ليش بعده ميتعاطى مادري ... عزيري العراق جربي بشرفي تفوتك .... هي تهي وين نايم انت اكو عراق ثاني دتحجي عنه لو نفسه بلدنا الي ببالي

ايباه يا عراق الخير ايباه يا بلاد الرافدين هاي تاليها تصير بلاد المتعاطين... صدك جذب يا بلدنا ادري شبيك متكلي شبيك مو كتلك لا تمشي ويه كل احد تره والله يطلعون عينك هاي تاليها ... مخدرات ... مخدرات يا وطنا ابد يعني هيج بكل سهولة، هاهي يعني خلاص اخر ما اجه بيدك تتعاطى مخدرات، هسه انت بيا حال حتى تدور سوالف مكسرة متكلي حسبي الله ونعم الوكيل.... والله ضوجتني يا ابو بغداد شو خل امسح رقمك والله الا امسح رقمك

يا شباب صدك جذب ... تره والله فشله من الجواهري من حمورابي يعني هسه السياب اذا سمع بشبباب البصرة يتعاطون مخدرات شيكول شيكتب شيلطم احتمال يرجع انشودة المطر من جديد ويسويها .... “انشودة الحشيش”

عيناك غابتا حشيشٍ بالاربعة العصر

او شابان فاصلان بمنطقتنا صار الهم شهر

شنو مخدرات وينه ووين هيج سوالف، شديصير يا شباب ليش نتعاطى شكوووو شكو زين شكو شباب... شنو البصرة بيها اكثر من ٥٠٠٠ مدمن 

شنو الديوانية ٤٠٪؜ بالمية من الشباب يتعاطون 

 هاي شكو يمعودين ادري هو شنو حَب شمس جبس العائلة شبيكم شباب

والله مادري شباب شكلنا متجهين نعيش ويه هاي المخدرات، يعني اي ممكن تسميها جزء من تراثنا وتأريخنا وحياتنا اليومية، يعني حياتنا بالبيت حتصير الاب يتغده يضوج يصيييييح يا ام فلان ... شكووووو شتريد يابه صار نص ساعة من كمل الغده وانتي لحد الان مجايبه مخدرات... يعني يا ام افلان يصير هيج مو تدرين بيه ما اكدر اذا مو مخدرات وره الغده لان راسي يصير يوجعني.  

حتى بالمدارس بعد ماكو حانوت مال طلاب ويشترون لفات وووووووووووووي شنو هاي شكد قديم انت لا حبيبي حانوت يصير يبيع مخدرات والرزق على الله وتلكي الطلاب بالصف بعد حتى فرصة ميدورون فاصلين من اول درس واصلين للدرس الاخير. 

ايباه يا بلادي يا بلاد الرافدين هاي تاليها ... يعني والله والله هيج حنصير تخيل وياي بعد ما كو محل يبيع لفات فلافل لا ابو الفلافل الي براس الفرع راح يصير يبيع مخدرات يطبخ مخدرات ويبيع. ومخلي كراسي والناس تجي تكعد وتتعاطى وتحاسب وتطفر. 

تروح تحاسب: 

سلام عليكم

عليكم السلام حبيبي شنو اتعاطيت خمسه ونص مال هروين وخمسميه مال لبن... اخليلك الباقي سفري...

ها الف عافيه

عزيزي الشاب العراقي، بشرفك سالفة اريد كل شي اجرب بحياتي عوفها يم المخدرات لان مبينا حيل... ندري بيك تحب الاطلاع على الثقافات الاخرى بس هاي اطفرها رحمه للهروين والله منكول عليك متخلف ولا غير مطلع، والله نسميك نيوتن والله دارون اي عالم انت اختار نسميك والله.  

يعني بالله بشرفكم هو القانون العراقي الشعب صاحي وممحترمه ولا مطبقة، بس تعالو كلولي اذا الشعب كله صار مدمن مخدرات القانون بعد منو يطبقة العصافير لو الكائنات الحية الاخرى، يعني المواطن جان يذب قوطية الببسي وبطل المي من الجامة مالت السيارة وهو صاحي... طيب اذا وهو فاصل ومتعاطي شراح يشمر الكشن مال السيارة من السيارة والله مادري، اشارة المرور المسكينه، والله مصيبة اللة وكيلك اذا صرنا هيج القانون نبيعه ونشتري بيه شريط احسن. 

الدعايات حتبقى نفسها بعد متفوت بينا المخدرات كول، اكيد لا استاذ انسه الطرق القديمة بالاعلانات واهلا بالطرق الجديدة خالييييييييي. 

اي بعد منا ورايح تفتح التلفزيون ميطلعلك شاي سعدون لا لا هسه راح يطلعلك الاعلان: 

قبل جانت العائلة بصعوبة تجي عالريوك بس من اجت مخدرات سعدون صاروا الكل يتسابقون عالاكل مخدرات سعدون تطفي العائلة. 

هسه احنه خلصنا عمرنا نسمع هذوله النجوم مال الطوبه من تكثر فلوسه يروح يدمن مردونا رونالدو 

هسه هذوله تمام نجوم ومن حقهم

هسه انت تلعب طوبه بالمنطقه والاهداف مالتك نعل ومرات شوطين انت ميخلوك تلعب على شنو تدمن بس فهمني يا ادريانو! 

ملينا كل يوم بالاخبار خبر عاجل اقدام رجل على قتل زوجته في محافظة بغداد، زوجه تقتل اولادها في محافظة المثنى وتشير التقارير أن الزوجه كانت تحت تأثير المخدرات، شاب في محافظة الانبار يقتل چلب برصاص حي ويذكر أن الچلب كل شي ممسويلة، وذكر شاهد عيان أن المجرم كان طافي وفاصل من الرئيسي. 

ايباه يعني احنه هيج محتاجين سبب للجريمة هيج يعني محد دايموت عدنا قله بالاغتيالات بالعراق المواطن ميشوف موت لذلك كلش محتاجين سبب للجريمة محتاجين شي يخلي المواطن ينقتل يا الله!!!! 

وثائقي

لم تعد المخدرات في العراق محصورة بما يُهرّب عبر الحدود فقط، فأنواع منها صارت تُزرع محلياً، لا سيّما الحشيشة والخشخاش، في مناطق متفرقة منها بغداد. في السابق، كان توفّر المخدرات في البلاد يرتبط بما يدخله مهرّبون عراقيون من محافظات الوسط والجنوب، أمّا اليوم فهي متاحة من خلال ما يُنتج ويُصنّع داخلياً، وهو الأمر الذي يجعل تكلفتها أقلّ والاتجار بها أكثر ”أماناً” بعيداً عن حرس الحدود.

الحمد لله والشكر زراعة مخدرات بالبلد ...... يعني المخدرات صارت منتج وطني, وينهم وينهم هذوله الي يكولون العراق مينتج كل شي مو هياتنا دنزرع مخدرات! هااااا 

يعني بس تعال فهمني يعني هاي الطماطه والبتيته والبصل والخيار والبأدونس كلها مو بعينك متزرع الا مخدرات 

والحل شنو مختار ؟ شبيكم بس تتهجم علينا ...هاااا شبيكم معودين وين يصير حل الحل هو بالتوعيه.. الي تسويها الحكومه تفتر ع المدارس تسوي مهرجانات تسوي اعلانات بالتلفزيون بس هو وين شتسوي اذا هي الحكومة نفسها تدخل المخدرات من الحدود من جيرانا الخيرين وتبيع للمواطنين هسه شلون وين ننطي وجهنا 

اذن مشاهدينا الكرام المؤتمر الصحفي للاستاذ الي ببالكم. 

 بسم الله الرحمن الرحيم على مواطنينا الحذر من تناول المخدرات لانها تفتك بالجسد والانسان.. بس شلون عدنا مخدرات والله تموت تلوك لهالحلك.. ولا بد من وضع حد لهذه الظاهره. .... اكول،  إسبوع ببلاش بس قرر. 



حلقات اخرى