تنوين | بلسانٍ عربي
تنوين | بلسانٍ عربي
:
:

وسائل التواصل الاجتماعي .. جانية أم مجني عليها؟

43:00
دقائق
تنوين
وسائل التواصل الاجتماعي .. جانية أم مجني عليها؟

حالة جدلٍ تحدثها وسائل التواصل الاجتماعي بين حامد حدوتة ووالدته وأصحابه، فمن يقول بأهميتها إلى ناصحٍ بأنها من المُلهيات ويتباكى على عصر بسيط مضى! فأي وجهتي النظر ستنتصر ياترى؟ تابعوا معنا الإجابة في هذه الحلقة من بودكاست النيل وحلقة من برنامج مشربية عن وسائل التواصل الاجتماعي جانية أم مجني عليها؟!


السوشيال ميديا وتغيير حياة البشر من الحياة الطبيعية ومقارنة بين الأجيال الحالية والأجيال القديمة من حيث الترابط الاجتماعي والنفسي

- ماتتفرج معايا علي المسلسل يا حدوته بدل مانت شغال تلعبلي ف التليفون ليل نهار كده

- وهو انا اعمل ايه يعني يا حاجه اشغل ايه والموبايل بتابع علي كل حاجه ليل نهار اي خبر عالتليفزيون لازم بتلاقيه هنا ع الموبايل وبشكل اسرع كمان

- بس يبني بيخليك ماسكه ف يدك زي اللزقه ليل نهار هيوجع عنيك وهيخليك تعبان طول الوقت 1زمان يبني ولاكنا نعرف ولاتليفون ولانيله وكنا عارفين برضضو الدنيا فيها ايه

- لا يا حاجه مش زي دلوقتي برضو دلوقتي الوضع اتغير كتييييير اوي دلوقتي انا عن طريق برامج السوشيال ميديا دي اعرف اكلم كل اي حد واعرف كمان الاخبار اوا باول واكلم اي حد فيديو زي ما بنكلم قرايبنا الي مسافرين بره كده

- فعلا بس برضو ميخليكش دايما كده ماسكه ف ايدك زي ما يكون هو الي مالكك و بيتحكم فيك ده انا بحس انه لو اتقفل النت يومين هتروح مننا يا حدوته هههههههههههههه

- والله عندك حق ده انا حتى بزهق من نفسي وبلاقي نفسي قاعد بس ع الموبايل بقلب فيه وخلاص ولا بلعب اي لعبه د الوقت ده لو استغليته انه اتعلم حاجه ع النت كنت اتعلمت حاجات كتير اوي

- طول عمرك خايب

- هههههههه والله لا يا حاجه م انا بس ده كل صحابي كده ومعظم الناس كده دلوقتي حتى لو نزلتي المتروولا حاجه هتاقي الناس كلهم كده كل واحد ماسك موبايله وعمال يقلب ف الفيس ولا بياخد اي فايده

- خدي عندك بقا كمان الناس بقوا قلالات الادب خالص كل شويه ده يشتم ده ع النت كده قدام الناس عشان بس لو مختلفين ف الراي ولا حاجه واما يصدقوا دول يشوفوا حد يعارضهم دي تحصل مصيبه وينزلوا شتيمه ف بعض وشتايم قذره تدل على انهم مش بيحبوا بعض

- ربنا يهديهم يبني المهم بس خد بالك كده من نفسك ومتمسكش الموبايل كتير عشان انت كده بتفوت كتير اوي من يومك من غير ما تعمل حاجه مفيده

- ان شاء الله يا حاجه ادعيلي بس انتي كده علطول ان ربي ييسرلي

- دايما يبني داعيالك علطول

- طب ايه مش عاوزه اجيبلك موبايل انتي كمان عشان تخشي ع النت هههههههههه

- هههههههههههههه يبني هناخد زماننا وزمن غيرنا احنا يبني عيشنا العيشه الصح زمان ربنا يقدركوا عليعيشتكوا دي عيشه ولا ليها طعم كده وماسخه مش زي زمان مش فاكر انت زمان ؟ وانت صغير مانت لحقت الايام دي قبل التليفونات

- ايوه فعلا لحقتها كان موجود بس 9 قنوات ع التليفزيون بس مكناش بنشوف الا الاولي والتانيه ههههههه كان دايما بييجي مسلسل واحد وكل مصر تتفرج عليه ولا عالم الحيوان الي بعد صلاة لجمعه كنت بحبه اوي

- ايوه فعلا جدتك كانت بتحبه اوي وكانت دايما بتتفرج عليه وكنا بنجهز المحشي السخن قبل الصلاه وكلكوا تتجمعوا تيجوا تاكلوه ف ثانيه واحنا بقالنا خمس ساعات بنجهز فيه هههههه بس بالهنا والشفا بقاا

- كانت ايام حلوه فعلا قبل ما كل حاجه بقت عامله زي الاله كده اليومين دول

- طيب ياخويا حاول بقا تتحكم ف نفسك شويه وترع الايام دي بقا مع اصحابك

- صحابي ايه يا حاجه ده احنا بنقعد مع بعضينا كل واحد بيقعد ف تليفونه وممكن كمان نقعد نلعب العاب اونلاين وخدي المضحكه بقا احنا ممكن نرد علي بعض ف التعليقات ع الفيس واحنا قاعدين مع بعض ف نفس الوقت ههههههه

- ده انتوا بقت حالتكوا صعبه اوي بس تعرف مع انه مفيد الا ايام زمان برضو كانت حلوه اوي يعني ابوك كان مسافر زمان الخليج عارف كان بيعمل ايه عشان يطمنا عليه ؟؟ ويتكلم معانا كتير ؟

- ايه ؟ ماهو كان فيه تليفونات

- كان فيه بس كانت قليله وغاليه اوي كان يا سيدي بيسجل شريط كاسيت ويتكلم فيه بق عن احواله وهو عامل ايه والشغل عامل ايه وبطبخ ايه وكل حاجه بيعملها ف حياته واحنا بقا قاعدين مستمتعين وعمالين نسمع وفرحانين اوي

- طب وكان بيبعته ازاي اصلا

- انت يلا مخك تخين ههههه كان بيبعته مع اي حد نازل طبعا

- اه تصدقي فعلا ههههههه

- كانت يبني احلا ايام و الجوابات الي كانت بتتبعت وتقعد مستني علي ما يوصل ولما يوصل الجواب تقعد تقرا فيه مرات كتير وابوك كان يقعد يسلم عليك وعلى اخواتك وبيعت هدايا حلوه ولبس العيد مش زي دلوقت الي متجوز يقعد يكلم مراته ليل نهار لحد ما يزهقوا منه ههههههه

- طب ما دي حاجه حلوه انه يكلمهم ليل نهار

- حاجه حلوه اه انه يطمن عليهم بس الحاجات الحلوه بتاعت الاشتياق والحاجات دي بتكون حلوه و بتزود جو الدفا في العيله

- كل زمن بقا وليه وقته انا متصورش انا اعرف اعيش من غير التليفون والسوشيال ميديا ده ده كل حياتي فيه دلوقتي واصحابي ومعارفي ده حتى ممكن نلاقي عليه شغل جديد و الناس بتبيع عليه حاجات كتير فيه حتى ناس بتكسب منه فلوس

- يبني انا مقلتش انه وحش انت بس خد الصح من اي حاجه وسيب الغلط او خد الحلو وسيب الوحش

- ان شاء الله ربنا ييسر الامور وييسرلي

لل- امين ياااااااارب

- صحابي بيبعتولي رسايل اهم بيقولولي يلا نخرج

- هتخرجوا تروحوا فين دلوقتي

- مش عارف ممكن نروح نقعد بعديد او نتمشى شويه

- خلاص ماشي خدوا بالكوا من نفسكوا

- ماشي يا حاجه مع السلامه

- مع السلامه يبني

ايه يا جدعان هي دي الخروجه ؟؟؟ كل واحد ماسكلي موبايله ؟

واحنا نعمل ايه بس يا حدوته خلاص خدنا علي كده ده انت اول واحد بيعمل كده يا جدع

ههههههه ايوه اصل كنت لسه بتكلم مع امي ف الموضوع وقالتلي كلام كتيييييير عن حلاوة الدنيا زمان من غير السوشيال ميديا ولا الكلام الفاضي ده ايوه فعلا كانت حياه حلوه فاكر ياض يا حدوته ؟

يا سلام وهي دي ايام تتنسي يا جدعان احنا برضو معيشناش فيها شبابنا فعشان كده مش حاسين بيها اوي بس الاكيد ان الروابط الاجتماعيه كانت اكبر وكان الناس بيقعدوا معع بعض اكتر

ايوه فعلا الناس كانت بينهم مساحه كبيره ووقت كبير كانوا يقدروا يعيشوا مع بعض و يتكلموا مع بعض ويتشاركوا حياة بعض احنا دلوقتي يعم بقينا نصحا من النوم ماسكين الموبايل ف ايدينا زي اللازقه و الواحد يفضل ييجي ساعتين ماسك الموبايل يكون الوقت هدا وراح و فاتتهخ حتى صلوات كتير ميصليهاش

فعلا دي اكتر حاجهه تزعل ده حتى في رمضان العيال ف الجامع بشوفهم ماسكين الموبايلاتوعمالين يقلبوا ف الفيس بوك ووالانستجرام ومحدش فيهم بيصلي ولا بيقرا قران زي خلق الله

مهما كان احنا بنفتح النت كتير بس برضو فيه حدود المسجد ورمضان ده حاجه تانيه

فعلا يا حدوته عندك حق واهو رمضان قرب اهو اصلا عاوزين نستغله بقا من دلوقتي و نحلول نجتهد عشان نقضيه كويس واحسن من قبل كده

ان شاء الله

دلوقتي لقيت انا مقال اهو كنت شفته بيتكلم عن كيف تؤثر مواقع التواصل على سلوكيات الشباب

ده منشور فين ده ؟؟

علي مدونات الجزيره اسمع ياسيدي بيقولوا ايه في الآونة الآخيرة أصبح العالم يدور في فلك الرقمنة والإنترنت ومواقع التواصل والتنافس الاجتماعي، العالم بات مختلف عما أعتادنا عليهِ في العقود التي مضت، وسبقت ظهور الهواتف الذكية والحياة المثالية لشخوص السوشيال ميديا. هذا مفكر وتلك مدونة موضة وهذا باحث وفيلسوف، وتلك تستعرض أسفارها ورحلاتها برفاهية وغيرهم الكثير ممن تعددت منتجاتهم وأفكارهم وطروحاتهم وآرائهم حول كل شيء فهذا ينصح بما يجهل، وتلك تدعي ما لا تفعل. فيما يتابع هؤلاء قبيلة من الشباب والمراهقين متأثرين بالهامش المِثالي الذي يقوم أصحابهُ بمشاركتهُ وتصويرهُ على صفحاتهم التي تعج بالإعجابات والتعليقات.

يُبدون إعجابهم بهذهِ الحياة التي تستعرض أمامهم محاولين تقليدها أو السعي لعيش شيء مشابه لها، معتقدين إنها حياة كاملة لا تشوبها شائبة ولا تَحول بينها وبين سعادة تليها سوى لحظات مِثالية من الراحة والإيجابية والطموح والربح؛ الكثير من الربح من جمال مثالي يستعرضهُ هؤلاء المشاهير لكنهُ مغلف بفلاتر متعددة تحاول أن تؤكد أنها تعكس الحقيقة لا شيء سوى الحقيقة. ما تقدم ليس هجوم على هؤلاء السادة المؤثرين حاشاهم من النقد فكل نقد بالنسبة لهم وكل من يسدي نصيحة أو يصحح فعل يعتبر من أعداء النجاح! النجاح على مقاييس شخصية وحياة خاصة لا تتجاوز حدودهم المحمية بغرور ونرجسية وزهو بالنفس لا يظاهيه شيء.

أمر لم يبقى حصرًا على الفاشنيستا وخبيرة التجميل وأتباعهم بل تجاوز ليصل إلى الشخصيات التي تعتبر ذات مكانة علمية وفكرية واجتماعية. حتى الإيمان بالمعتقد والدين والدنيا والخير والشر بات نوع من الفلسفة يطرحها أصحابها كُلًا حسب فكرهُ ومعتقدهُ بثقة كبيرة ويقين تام، تجعلهُ يؤكد أنه الصواب بجمهورهُ الذي يتابعهُ مؤيدًا لكل ما يقول دون نقاش أو دليل فالتجارة أصبحت بأوجه متعددة ووسائل التواصل وسيلة تسويق ذات تأثير عالٍ.

فيما ترى الأخصائية في علم النفس الدكتورة نور المعلا بعد سؤالها عن تأثير السوشيال ميديا على المجتمع والأفراد أن لمواقع التواصل الاجتماعي عدة جوانب بعضها إيجابي كأكتساب المعرفة والتواصل مع أقرانهم في مجتمعات آخرى تعزز لديهم فكرة تقبل الآخر؛ لكن للجانب السلبي أثر أكبر خصوصًا على الشباب، على الرغم إنها تفتح مجال واسع لهم للتعبير بحرية عن آرائهم ورغباتهم لكنها تساعدهم في خلق عالم خاص يشبه ما يرغبون أن يعيشوه على أرض الواقع مما قد يؤدي إلى أصابتهم بحالة عُزلة عن محيطهم.

وأضافت المعلا أن الأولوية بالنسبة لهؤلاء الأشخاص لعالمهم الافتراضي لتحقيق ذواتهم وتطلعاتهم متأثرين بأقران آخرين في محاولة السعي الدائم للظهور بصورة مثالية عن طريق مشاركة صورهم وأهم أحداث حياتهم في أنتظار التعليق عليها والإعجاب بها من قبل أصدقائهم ومعارفهم. كل ذلك يجعلهم يعيشون تحت ضغط نفسي من الترقب والقلق دائم ومع كل تفاعل يصل إليهم يشعرهم بالأمان وتحقيق الذات الوهمي بعد إعجاب الآخرين بالصورة التي يعكسونها عن حياتهم وهذهِ تعتبر من الحالات الأكثر شيوعًا في المجتمع وتصيب فئة المراهقين والشباب من كلا الجنسين.

فيما كشفت أحدث الدراسات في علم النفس أن الفئة الأكثر تأثرًا بما يعرض على مواقع التوصل الاجتماعي هم من النساء ففي حال شاهدن إحدى الشخصيات تقوم باستخدام منتج أو ترتاد مكان معين أو تتبع أسلوب ونظام حياة معين يتفاعلن مع ما شاهدن من خلال الشراء أو الذهاب لذات الأماكن وتصويرها ونشرها للآخرين لتحقيق حالة إشباع نفسي والشعور بالرضا.

ختامًا لابد لنا أن لا نسعى ونطمح لأن نكون نسخة من حياة أشخاص آخرين ولا نتأثر ونصدق كل ما نقرأه ونشاهده من خلف الشاشات من خلال هؤلاء الأشخاص الذي يطلق عليهم بالمؤثرين فهم بشر معرضين للخطأ، وأن نستخدم هذهِ الوسائل فيما ينفع كنشر الوعي والعلم بصورة تجعلنا نحافظ على القيم الإنسانية الخاصة بنا كأشخاص مستقلين ولا نكون مجرد نسخة مكررة ومشابهة لغيرنا

-فعلا يا حدوته انت عندك حق مقال رائع لازم فعلا نستخدم استخدام صحيح

هو حقيقه انا مبحبش اضخم المواضيع ولا اتكلم في ثوابت الحياه ( زي موضوع استخدام الموبايل ) لاني عارف اهميه ده بالنسبه لاي واحد ( ده الفيسبوك قفل شويه كنا هنعمل ثوره في التحرير )

بس كنت بقرأ اخر دراسه عن استخدامه للحوامل وعن تاثيره علي الانسجه وانه بيعمل اضطرابات سلوكيه للاجنه وبتظهر متاخر في سن السابعه علي الاطفال فقلت ندردش شويه

الدراسه بتقول اننا لازم نقلل استخدام الموبايل وان استخدام سماعه البلوتوث في اجراء المكالمات اقل ضرر من الموبايل نفسه وده لابعاد اشعه الموبايل عنك وعن بطنك ( بيقولوا الموبايل مش لازم ينام جمبنا علي السرير ممكن نعمله غرفه لواحده او ينام في البلكونه عادي)

وكمان استخدام الكمبيوتر في الانترنت اقل ضرر من استخدامه علي الموبايل وده طبعا لمدمني السوشيال ميديا ( وده مش هيخليني استغل الفرصه واعرض اللابتوب بتاعي للبيع_ اسود_ حديث_ استخدام طبيب _ لاعلي سعر) ده غير بقي باقي الدراسه الاجنبيه الي بتقول انه بيسبب انتقال العدوي وقالوا انهم بيوصوا بتعقيمه باستمرار لمنع انتقال العدوي للوجه والفم ( ده طبعا جزء ميخصناش لاننا لسه بنوصي بغسل الايدي بعد دخول الحمام اصلا ) ( احنا يا مؤمنين مبنغسلش ايدنا قبل ما نطلع من الحمام)

وبرضوا بيرغوا في موضوع ادمان استخدام الموبايل وان ده بيفصلنا عن المجتمع ( برضه مش لينا كمصريين احنا نفسنا نفصل عن حياتنا اساسا)

انما في حاجات سهله زي اننا نعتمد علي الخط الارضي لاجراء المكالمات ( هنطلع التليفون ابو سلك من لعب العيال تاني)

عدم التطويل في المكالمات علي الموبايل( ال يعني ندخل في الموضوع) ( احنا السلامات بس بتدخل في ساعه ) ( انا في مره واحد كلمني و زعلان اني مش فاكره و قعد يفكرني ويسلم علي العيله نفر نفر لحد ما رصيده خلص من غير ما اعرف كان عايز ايه ولا هو مين اصلا)

يظهر يا اخوانا الدراسه دي مش لينا خالص هههههههههه

فيه برضو حاجه يا شباب انك تفضح شخص عادي علي السوشيال ميديا امر مرعب بالنسبالي ناهيك عن انك تحط كمان صورته و اسمه و آلاف الناس تنشرها يبعتوها لبعض، مهما كان غلطته او خيانته، الإنتقام ده مش هيريحك ولا يجبر كسرة قلبك، هو بس هيدمر الشخص الي انت فضحته للأبد .. و كلنا بنعمل حجات بشعة في حياتنا يا جماعة و بعدها ممكن نندم و نتوب توبة نصوح و الله، فيارب منصحاش في يوم من الأيام نلاقي سيرتنا علي كل لسان و نفضل ندفع تمن غلطة عملناها العمر كله

اذا افترضت صدق الراوية، نفترض ان القصة دي محض افتراء، اصل ايه اللي يخلينا نصدق طرف و الطرف التاني مكتبش حاجه ولا كان في شهود محايدين ع القصة دي .. الفيسبوك مش ساحة قضاء ودي من اكتر السلبيات المخيفه لمواقع السوشيال ميديا في التشهير بالناس حاجه غلط جدا والناس مش بياخدوا بالهم من الكلام ده كلو بيشير اي حاجه وخلاص

-عندك حق لازم ده الي يحصل مننا كلنا يا حدوته احنا برضو لازم نبص علي الحاجات الحلوه فيه حاجه بقا عملتها السوشيال ميديا لو معملتش غيرها والله تكفي

- ايه هي يا ابو العريف

- والله يبني عندك حق

- تفتكر من غير مواقع السوشيال ميديا كان الشباب عرفوا يتجمعوا اصلا ؟؟

- ايوه ده اصلا الثوره كانوا بيقولوا عليها ثورة الفيسبوك

ويوم موقعة الجمل كانت الثوره الي عملها الشباب بالفيس بوك الحكومه بتهاجمها ببلطجيهه راكبين جمال وحصنه ههههههههه

-بس هي فين بقا الثوره دلوقتي ياعم حدوته مهم ضحكوا ع الشعب ولبسوا كلو ف بعضو ورجعوا اهم تاني للسلطه ومحدش بقا يقدر بس ينزل الشارع

- ولا حد حتى يقدر يتكلم خلاص يعم حتي مبقاش مع الشباب والشعب الا السوشيال ميديا يفرغوا فيه كبتهم وزعلهم على بلدهم الي راحت منهم بعد ما عملوا ثوره كان العالم كلو بيتحاكا بيها والله

- فعلا كان كلو مبهور بينا والناس كان عندهم استعداد يتغيروا حتي كنا بنشوف حملات تنضيف الشوارع والنظام رجع بس ايه بقا كلو انتهي دلوقتي بقينا ناخد بالجزمه وساكتين

- ربنا يفكها علينا يا صاحبي ويفكها على كل مكروب ياااارب

- امين

- ايه مين الي جاي هناك ده ؟؟

- ده حسام غير بقا الموضوع عشان ده عامل فيها فيلسوف اليومين دول وهيقعد يتكلم ساعتين ههههههههههههه

- لا يعم خليه ييجي وناخد رأيه برضو

- اهلا يا حسام عامل ايه يا جدع

- الحمد لله انتوا عاملين ايه ؟؟

احنا بخير جعانين بس وعاوزينك تعزمنا

-يا سلام هههههههه طبع هتعزموني فين بقا ؟؟

- استاذ خلعان انت ههههههههه كنا بنتكلم في موضوع السوشيال ميديا بما ان ابوك مسافر وبتتواصل معاه اغلب الوقت على السوشيال ميديا قلنا كده ايه لخلاصه في الموضوع ده عشان زهقنا من الكلام فيه

- دايماً الحياة في تغيير مستمر ،، وهي نفسها مستمرة ،، التغيير ده بيبقي علي أشكال كتير متنوعة ،، أخر كام سنة التغيير المهم الحاصل في حياة كل البشر علي مستوي العالم هي وجود السوشيال ميديا في حياتهم ،، واد ايه غيرت السوشيال ميديا ،، تخيلوا معايا كده أن السوشيال ميديا كانت سبب في ثورات ،، كانت سبب في أقالة وعزل رؤوساء ،، سبب في موت بشر وإنقاذ ارواح بشر تانية ،، مساعدة وتغيير حياة البشر للأحسن زي جروب #جت_في_السوستة مثلاً ده جروب حلو اوي بيساعد اي حد محتاج حاجه والناس فعلا بيوصلوا لبعض في الخير كلو وكلو بالاصول والناس والله ما حد فيهم بيقصر في حاجه زي ما بيقولك اعمل الخير وارميه في البحر ،، في نظرية بتقولك ” طلما أتعودت علي حاجة ،، بتنسي ازاي كان حياتك قبل الحاجة دي ” عايزك تتخيل معايا حياتك قبل الفيس بوك ،، فاكر ؟

- مش فاكر اوي ده كان من زمان يعني وبعدين مكنش ف دماغنا حاجه لاننا كنا اطفال مفيش هموم ولا حاجه

طيب فاكر كنت بتقضي الوقت اللي بتقضيه علي الفيس بوك كنت بتقضيه ازاي قبل الفيس بوك كل ايام وليها حلاوتها اصلا واحنا ايامنا دي لازم نعيشها ونعاصر التكنولوجيا ومنخليش حاجه تتحكم فينا يعني ناخد الحلو ونسيب الوحش

-ايوه انا امي قالتلي كده فعلا وانا بناقشها ف الموضوع ده

- طول عمر الحاجه يبني بتقول كلامم مظبوط وزي الفل .

الخلاصة ،، برغم التأثير الإيجابي القوي للسوشيال ميديا وفايدتها الإ أن في جوانب سلبية وأهم الجوانب السلبية هي ذبول وضمور المشاعر الإنسانية بين البشر وأصبحت مشاعرنا عبارة عن شوية( إيموشنز ) المعايدات حالياً بقيت صورة او فيديو أو بوست تخيلوا تبقي أعيادنا معيداتنا فيها تبقي مشاعر عبر الشاشات مفتقد جداً أعياد زمان

-مش قلتلك هيتفلسف و يوجع دماغنا ههههههه

- لا يعم ده قال كلام مظبوط والله وانا حبيت كلامه لازم فعلا ننقي وناخد الي ينفعنا ونسيب الي يضرنا

- يلا بق انا لازم ارووح عشان ورانا شغل بكرا تصبحوا على خير



حلقات اخرى

وسائل التواصل الاجتماعي .. جانية أم مجني عليها؟

وسائل التواصل الاجتماعي .. جانية أم مجني عليها؟

النيل بودكاست   |   بودكاست مشربية
الرشوة.. عندما تتحكم في مستقبل الإنسان

الرشوة.. عندما تتحكم في مستقبل الإنسان

النيل بودكاست   |   بودكاست مشربية
كيفية صناعة الجواسيس ودورهم الخفي في مصير الشعوب والأنظمة

كيفية صناعة الجواسيس ودورهم الخفي في مصير الشعوب والأنظمة

النيل بودكاست   |   بودكاست مشربية
التعليم الخاص وأثره على المجتمع

التعليم الخاص وأثره على المجتمع

النيل بودكاست   |   بودكاست مشربية
حنكش بلطجي الحارة

حنكش بلطجي الحارة

النيل بودكاست   |   بودكاست مشربية
الخرافات ..قصص حقيقية أم مجرد حكاوي مسليّة ؟

الخرافات ..قصص حقيقية أم مجرد حكاوي مسليّة ؟

النيل بودكاست   |   بودكاست مشربية